LISOD SUBAYON

Ang nagabuhat ug daotan apan  nagpakalimpyo, ang resulta layaw. Apan kadtong gitamay nga nagbuhat sa matarong  ug gilibak  nga daotan  lisod nga dalan ang subayon!

ANG PAGTABANG

"Lihok tawo kay tabangan ko ikaw", usa ka panultihon. Wala magpasabot nga tabangan kadtong nagbuhat ug  daotan kundili kadtong nagabuhat sa matarong lamang!

KALAMPOSAN

Dili man siguro problema o hisgotanan ang imong pag-abot sa imong kalamposan,kundili giunsa man nimo pag-abot sa maong kalamposan:  sa matarong o malinis ba, o sa hiwi o daotan ba nga mga pamaagi nga nakab-ot mo kana!

PAGBATOK

Kinsa kadtong mobatok sa ilang mga ginikanan may balos kon sila maingon na usab niini gikan sa ilang mga anak!

PAGPAKAARON-INGNON

Mas  maayo pang magpakaaron-ingnong dili tarong kay sa  tarong nga magpakaaron-ingnon!

MAKABUNGOG

Makabungog ang kusog nga pagakpak mas pa ang hinay nga paglibak!

HIMUON

Kon wala kay laing mahimo sulayi paghinuktok  basin diha sa kahilom motumaw ang daghang mga maayong buhatonon!

MAKADIYOS

Ang pagka bahandianon dili bantayog nga angayng ipasigarbo kundili ang pagkamakaDiyos nga walay kataposan!

NAHISAMA

Ang kahimtang sa atong pagpakabuhi nahisama sa usa ka ligid: Dunay panahon nga naa ka sa ubos , ug may  panahon sab nga naa ka sa  itaas!

MOPAULI

Bisan unsa ka taas sa kinabuhi sa lubnganan adto gihapon mopauli!

MAOT

Ang pagka manggihatagon usa ka matang sa birtud o hiyas, ug  ang pagka dawo  maoy  usa ka maot  nga  batasan.

PAGHATAG

Bisan  unsa ka kabos kon mohatag kinasingkasing,bisan unsa ka dato kon maoy mohatag dunay mopatigbabawng garbo!

PAGKA DAWO

Sagad  sa hingayo, dawo!

HUNGOG

Alang sa mga matarong palabihon ang dungog,   alang sa mga   hungog bahalag sa daghang salapi mabungog!

TAPHAW

Kon bakikaw  kanimo ang pagpangagda  sa natagamtaman nga kalipay, ayg  kasagmuyo kon balibaran ka sa uban kon moabot na kanimo ang mga kasakit!

ANG KABALAK-AN

Ayaw pagkabalaka nga naitos ka karon sa mga kasakit,maoy pangandami kon mahurot na ang kalipay nga imong gitagamtam  karon.

TUGBANG

Ang dili malalis nga butang niining kalibotan nga ang tanang mga panghitabo adunay tugbang!

PERMANENTE

Ang kausaban maoy permanenteng  butang niining kalibotan

PAGPAAMBIT

Usahay ang  lunsay nga gugma dili nimo mabatyagan kundili ka makahibawong mopaambit niini ngadto sa uban.

MAKALANAG

Usahay ang labihang garbo sa usa ka tawo  makalanag  diha sa nahitungdan.

KAPUSLANAN

Dunay mga butang gastohan ug minilyon diyutay rag kapuslanan,apan dunay  diyutayng mga butang nga mokitag minilyon ug mas dako ang kapuslanan.

PANGANDOY

Duna kay pangandoy sa umaabot,pero magbantay ka unsang matang sa pangandoy o gusto mong kab-oton nga mahitabo kanimo sa umaabot!