ESTORYA RA

Ang tawong nagdaghan lang ang estorya mao usab ang diyutay ra ang nabuhat!

PINASKOHAN

Ang  pinaskohan dili na kinahanglan pang pangayuon kundili kabubut-on na kining itunol si kinsa  man  ang gustong mohatag!

HUYANG NA

Kon wala pa ikaw mahaw-as   karon sa giantos  mong mga kasakit ayaw ingna nga walay Diyos,tingali  huyang na ang bateriya sa imong pagtuo!

MOLURANG

Matag  tawo  may unos sa iyang kinabuhi apan kon molurang mopatigbabaw usab ang timgas nga kalipay.

KALIMTAN

Timan-i kon hapdos pa gani ang mga samad magtipun-og ang mga panaad,apan kon wala na gani ang mga pag-antos hikalimtan na lang ang mga Santos!

HALANG

Dili tanang hinog nagdala ug katam-is  kay  adunay kahinog nga nagdala ug kahalang!

ANG HINUGNAN

Ayaw hinugni ang gatas nga nayabo,maoy hinugni nga dili mabuak ang baso.

PAGBINATIAY

Ang Pasko maoy panahon sa pagbinatiay,apan dili ba diay mahimo kon ato kining buhaton sa matag adlaw  sa tibuok tuig?

MOPITIK

Ang kaanyag sa dagway naa ra  sa panit,pero ang kaanyag nga naghulma sa imong galamhan mopitik diha sa imong kasingkasing.

DILI MAHIMO

Mahimo ra usahay ang tawo walay kuwarta,pero ang kuwarta dili mahimo kon walay tawo

WALA

Maayo pa kunong kuwarta kay dunay tawo,pero ang tawo way kuwarta!

PAG-RESPETO

Matod pas uban,kon bation kag kaulaw kana nagtimaan sa imong pagrespeto sa imong kaugalingon;kon dili ka bation ug kauwaw kana nagtimaan nga wala kay baruganang pagkatawo.

PALINGINON

Sa kinaraan palinginon una ang buwan una pakaslan;karon palinginon unang tiyan una pakaslan.

MAY PUROHAN

Maayo pang pilion ang batig nawong kay may purohan pang maguwapa;kay sa guwapa nang daan unya mausab ug mangil-ad ang batasan.

GUWAPAHON

Dunay guwapa nga isnabera, pero duna sab batig nawong nga kanunayng mapahiyumon!

MAALAMON

Ang tawong maalamon mahadlok magpakasala kay nahibawo sa iyang buot buhaton;
Pero ang tawong hungog gustong maglunang sa pagpakasala aron ingnong maalamon.